‘N  dì me ho ‘nsegnà la refa, me ho metù inter la bisaca, aveve deciso de ‘ndar tel bosc, par piotole. Parte, là, ciape su par ‘sta  valena, traverse via ‘na meza val, su par ‘ste laiche, e arive te ‘na piciola selva de peci; là le gh’era a pila le piotole, piotole ‘n  poc piciolote, piotolign, dison, eco, e gh’era ‘l Frolo e ‘l Giocheleta e i me ha aidà, così ho fat prest a ‘mpienir la bisacola. La  era ‘n poc vecia e folada, me ho nascort che te ‘n canton la era ‘n fin ‘n poc dellis. Alora l’ha dit: “ No as ‘n spac ! ” E dighe: “ No  l’averò, ‘ndelo ”. E l’ho gatà e me ho fat ‘n grop  che no le me scampe fora. Dapò aveve ‘n poca de se, ho vardà ‘ntorn, là, e dighe: “  Tò gnanca ‘n rogial da poder bever “, ma ‘nvese, me n’ho ascort tut te ‘n colp, zu te la busa, che gh’era ‘na specie de pozaitera   ma l’acqua l’era fredola e no la era bona, la saveva da marsogn e ‘nfin ‘n poc de oder da pesina. Là ‘ntorn se vedeva calche  chegola, se capis che l’era pasà ‘l caorer, e l’era tut ‘n palta, ‘n spatusò. ‘N chela lo vedù, là de sora, che gh’era ‘na bela  baitola, vegniva su ‘na gran fumana, dighe: “ Là i se brusa la raza, ghe vorie ‘l spazacamin ”. E me ho ‘mpensà: “ Vaghe a veder se  ghe int valgugn ”. Ciape su par ‘sta pontera, traverse ‘n peagnol, sì, ‘na specie de pont, ‘n bel manz era là tacà, la fora, e ‘na  gran fedona. Cuche int: valgugn segur, i era ‘n desnöf o vint ‘sti canopi. Bate là e vaghe int: i era tuti ‘nbafai sù che i pareva i  popi Deldoric, tut omeni e sol ‘na femena, la Margiana. Dighe: “ Ma sola ? ” E ela: “ E’ sola! ” I era là tuti ‘ntorn a ‘na taolana,  fata de ‘na gran borela, e par caregheta ‘na borelina. Gh’era ‘l Nuc che ghe contava la storia del General Barattieri, la  conquista del castelo. L’è stat bel veder ‘sto contrasto de colori ‘ndovinai. Gh’era ‘l Valantin cola barba rosa, ‘l Bortoleto col  ciufet moro, ‘l Bastianela col cao bianco, ‘l Lovisol col mus roso e ‘l Spangherin col maon moreto. L’Andreola,  semper cavalier, ‘l ma fat sentar zu, là, su ‘na piera, ‘na gran pierona e ‘l Titot, che no l’era cianco e semper dur, se capis che  ‘l faseva ‘l cantinier, ‘l tös qua ‘n barusel che ‘l se perdeva ‘l cerce. Dighe:” Qua doresà ‘l pinter”. ‘L ghe tos via la capocia, sì,  ‘l capelet, ‘nsoma, ‘l men tras fora ‘n goto te ‘n gran biceron; ‘l me ha ben lagà ‘n poc de colet, ma de chel che no macia e che  no das ala testa, no so l’era de chel de la Moidele o de che dela Picona, e po’ adiritura anca ‘na tozola de bira, de chela dei  bireri. ‘L Pinzan ‘l tos fora la borsa e ‘l men das ‘na cica, ‘l Bisegol ‘na presa de chel de Santa Giustina. L’era tut ‘na fumana,  che ‘l faseva cimegar. I aveva là ‘n bazar: sun finestrola gh’era ‘na pegnata, con zu ancora calche gnoc, ‘na cabia con int ‘na  lugherina e ‘n capel de chi del capeler; te ‘n canton ‘n bel foc, con su ‘na ramina de garnele, garnele ‘n poc piciolotole,  garneleti, dison, eco. Dapo’ i se aveva ben fat anca la polenta e su ‘na casela, là, i aveva  ‘n bel toc de formai vecio, ‘n piciol  poinelin, de chi del malga, ‘na pegnatola de lat de pegna, doi caves de luganega, e po’ i se aveva fat ‘n fin ‘na maoca, ‘na  specie de ramaiza. I aveva là ‘n piciol fornat, ‘n tinol con zu ‘n pochi de crauti, e po’ gh’era anca ‘l Pecio e ‘l Tocio, che, ‘n tra  tuti doi, i ha fat ‘l pocio. Su ‘n a brocheta i aveva tacà su ‘l so salin e là, te ‘n aoter canton, ‘na pilota de felesi, con su, de ogni  una, la so sacheta. I aveva anca tuti ‘l so sciopet. La Margiana, tut ten colp, l’ha ciapà un de ‘sti sciopi e i lo ha spostà, e i lo  meteve là vesin al foc. Alora ‘l Zanet ’l dis: “ Cara, no là !” E ‘l Gorio: “Za, no là ! ” Su ‘n brocheton i aveva ‘n fin  tacà su ‘n  mandolin. Alora al Tonat dighe: “ Ti, sona ! ” E alora ‘l Marin ‘l dis: “ Sì, e chi elo che bala ! “. Là, da ‘na man, che se rosegava doi osi, gh’era ‘n cagn basot, morat, ‘n poc seco e ciusc, ma ‘n belot masciet, ‘na galina  bisa, ‘n poc sota, che tegniva su la zatela, l’aveva ‘n fin fat ‘n of ma desgalà, parchè no i aveva ‘l gal, ‘na pitola, color  canevela e ‘n pitol rosat, là, che specolava. ‘N chela se sent ‘n fifol e vegn là, a se posar su ‘n fero, che traversava la  finestrola, ‘n finco co la so finca e ‘l piciol, ‘n pù belot fincat, e dapò adiritura ‘n piciol paserino. ‘N chela, capita inter ‘na  vespa e la vè là ‘sto Sfruzat, co ‘sto nason, e la se posa su e la me das ‘n pù burt becon, e stimo che gh’era anca ‘na mosca,  ‘na pavela e ‘n tavan che me tormentava e ‘n pules sula schena che me becava; se vedeva ‘ndar ‘ntorn anca calche sbovo. I  aveva giusto brustolà l’orc e i ha fat ‘n cafè. Alora ‘l Micel ‘l dis:  “ Vos ‘n cafè o ‘l ? “ “ Oh, là “; dighe mi, “ come che volè voi  aotri “. E i me ‘ha dat ‘na bela copelota. Alora ‘l Gerghela ‘l dis: “Vos ‘n colin? “ E mi: “ Ma che colin, qua no ghe vol vardar al  fino, ale picoleze “.  Dapò i m’ha dat anca ‘n panet, de chi grandi, del pec; e ‘l Pileco ‘l dis: “ Te as tute le man da rasa, vos lavarte? “ Dighe: “ Mi,  oh, la, vè, qua l’è tut bon, putost, mama mia, santo ciel, siè ben ‘n poc masa generos “.  E ‘l Martinela: “ Ma che generos, l’è ‘na bagatela “. “ Oh! “ Dighe mi, “ qua l’è ‘n bagatelon “. Ma via, via me ho fat su ‘na specie  de papa e me ho magnà su tuto, no n’ho lagà de vanzo, a costi da me sgionfar fora ‘l ventricol, e, dighe la verità, che no i è stati  avari. ‘N chela se presenta, là, sula porta, ‘n Keisergegher e ‘l Ciaodan, che ‘l creseva de saver ‘l todesco, ‘l dis: “ Scoma,  Herr Cialdo! “ E chel’aoter: “ Nain, nain “; E via, ‘sto zorzon.  Dapò l’è capità là anca ‘l Valerat; ‘l dis: “ Che catapecchia “. ‘L me ha domandà se avean ‘na rangonela da ghe ‘mprestar e ‘l  Mazaron ‘l fa: “Ghera qua no so che rangon, ma ‘n aveve giudto mi una tacada su darè come ‘n coder. Dighe: “ La sarà ‘n poc  zompa, parchè se la dora a de tut, e l’è ‘n pez che no la ve’ ‘l moleta “.    ‘N chela capita fora da ‘n bus, tant de morsic. Dighe: “ Gio, che lonc “. I e tuti saotai ‘n pè, i ha fat su ‘n gazer, ‘n rapatan. ‘L  Giacatone ‘l zeiza e no ‘l se n’ha ascort che, là darè, gh’era ‘na brentelina, e zu ‘na tegna ‘sto toni col culo, ‘sto onzomer, ‘l  se ha ‘ncrastà, sì, incastrà zu.  ‘L Valger e ‘l Pinzanol i ghe ha aidà e i lo ha tirà su. ‘N chela ‘l cagn ‘l se met a baiar, alora ‘l Nenol ‘l dis: “ L’ha sentì un geore “.  E fora tuti, e ‘nveze l’era giusto vegnì fora dala so tana ‘n bel volpin, e gh’era là ‘l Zanoto Moca che ‘l parlava cert, e ‘l dis: “ Balda,  balda, che belot “. ‘Nchela mi dighe: “ Vardà, cari fanc, che mi me toca vardar de tirarme a casa, parchè n’ho ‘na meza càrega e ho  paura de ‘ndar via fiegol “. Alora ‘l Canefia ‘l dis: “ Ma va, là, che te ‘npreston ben ‘l caretin “. I aveva là ‘n bel gratel, de chi fati a  careta, così ‘l Picioci e ‘l Bincio i me tos ‘sta bisaca, i la leva, e mi e ‘l Beniamino ghe spenson sote ‘sta caredela. ‘L  Zanata ‘l tös ‘na stica sì ‘na specie de regol, e i me lo ha metù de travers, parchè no la me sbrise zu. Dighe: “ Qua ve faghe far  anca i fachign “. Ghe ho legà ‘na stropa, me ho metù inter ‘na carpela, e po’ chel’aotra, e me n’ho ascort che, te ‘na scarpa, se  destacava ‘n poch ‘na sola. Dighe: “ Qua dorerie ‘l Suster “. E me ho ‘mpenzà: - Ancöi ho fat fiera, qua e San Martin; ho gatà la  cucagna -. I ho ancora ringraziai e ‘l Roncassi ‘l me tös su ‘sta timonela, mi me faghe ‘l segn de croce con la speranza che la  vaghe bene e rödola zu par ‘sto bosch. ‘L me ha ciapà ‘na fuga, Dio benedet, e i aotri su tuti a grignar, a veder ‘sto Sfruz, coi  tachi tel cul, che galopa. Ma, par fortuna, son arivà a casa san e salvo, e così se ha ruvà ‘sta me aventureta, la Balatonda dei  Soranomi.  Cino Giacomelli 1907-1970 Torna indietro